BUTUAN CITY – Gidayeg ni Police Regional Office kon PRO-13 director Police Brigadier General KIRBY JOHN B KRAFT ang duha ka mananagat nga mitaho sa gidudahang bloke sa cocaine nga nagkantidad og 5.3 Milyones pesos nga ilang nakaplagan sa kadagatang sakop sa Tandag City, Surigao del Sur.
Base sa imbestigasyon, naila ang mga mananagat nga sila Junjie M. Villaver, 36-anyos og Paciano P. Villalba, 28-anyos nga parehong residente sa Brgy. Bongtud, Tandag City.
Nadiskubre sa mga niini ang bloke sa gidudahang cocaine nga mitimbang og usa ka kilo pasado alas 10:00 sa buntag sa nakalabay nga adlaw samtang sila nanagat sa Barangay Bongtud sakop sa maong lugar.
Gelayon nga gitaho nila kini sa Tandag City Police Station.
Si Hon. Alexander Pimentel, Governor sa Surigao del Sur mihatag usab sa cash reward ug usa ka sakong bugas sa duruha ka mananagat.
Ang narekober nga gitoohang cocaine, gikustudiya na sa Surigao del Sur Police Provincial Office – Provincial Drug Enforcement Unit alang sa tukmang disposasyon og ipailalom sa eksaminasyon sa Regional Forensic Unit 13.
