BUTUAN CITY – Nanawagan ang mga dagkong business groups ug labor unions sa nasud ngadto kang President Ferdinand Marcos Jr. nga muhimo og konkreto ug tukmang lakang batok sa korapsyon aron mabalik ang pagsalig sa katawhan ngadto sa gobyerno.
Sa usa ka open letter, ang mga organisasyon nga Employers Confederation of the Philippines, Philippine Chamber of Commerce and Industry, ug Trade Union Congress of the Philippines, nanawagan og tinuod nga reporma sa proseso sa national budget, pagbawi sa nakawat nga pondo sa gobyerno, ug pagtukod og espesyal nga division sa Sandiganbayan nga mopukos lamang sa mga kaso sa korapsyon sa imprastruktura.
Gibatikos usab niini ang hinay nga tubag sa gobyerno sa mga eskandalo sa korapsyon ug nangayo og transparensiya, regular nga dayalogo tali sa mga mamumuo ug mga tag-iya sa negosyo, ug paghatag og gahum sa Independent Commission for Infrastructure kon ICI aron maka-isyu og subpoena ug makapahamtang na og contempt.
Base sa bag-ong Pulse Asia survey, 97% sa mga Pilipino ang nagtuo nga lapad ang korapsyon, rason nga ilang gi-awhag si Pangulong Marcos nga ipakita ang tinuod niini kampanya batok sa korapsyon ug dili lang pasikat, samtang nagpasidaan nga ang padayon nga kakulang sa aksyon, makaguba sa pagsalig sa demokratikong mga institusyon.
