BUTUAN CITY – Gi-ila ni Senador Panfilo “Ping” Lacson nga pinaka-notorious ang lalawigan sa Bulacan pagpatuman sa mga flood control projects tungod kay gihimo na kining gatasan.
Sa iyang Privilege speech, gibulgar sa senador ang kalapasan sa duha ka engineers sa Bulacan First Engineering Office nga sila kanhi District Engineer Henry Alcantara ug ang mipuli kaniya nga si Engr Brice Hernandez kinsa natangtang na.
Kini ang rason nga ang maong lalawigan matud pa ang focal point sa pagpangabuso ug sa mga ghost infrastructure projects sa Department of Public Works and Highways kon DPWH.
Sigon sa Senador, ubos sa pagdumala sa duha sa maong buhatan, 28 ka proyekto alang sa tuig 2024 ang adunay parehas nga kantidad sa pondo bisan lahi ang kadak-on sa mga proyekto.
Gikataho usab nga usa kanila ang napildi milyones pisos sa usa ka casino sa Manila.
Gibatikos usab ni Senador Lacson, ang kwestyonableng flood control project sa Candating, Arayat, Pampanga human naguba pag-usab ang riverbank mitigation structure niadtong Hulyo ning tuiga bisan bag-ohay pa lang gi-renovate.
Gikan sa orihinal nga 20 Million Pesos nga pondo niadtong 2018, mi-abot na sa kapin 274.8 Million Pesos ang nagasto alang sa susamang proyekto, nga adunay 815% nga pagsaka.
Ang inanay nga pagkaguba sa istraktura, nagpakita lang sa pagpasagad sa contractor nga Eddmari Construction and Trading, kansa maoy kanunay nga makakuha og proyekto, bisan pa sa mga kontrobersiya nga nalambigitan niini, lakip ang pagka-delist isip Department of Human Settlements and Urban Development kon DHSUD builder niadtong 2023.
