BUTUAN CITY – Gila-umang madugangan pa ang 74 ka mga pamilya gikan sa unom ka mga purok sa Brgy Taligaman ning siyudad sa Butuan nga namakwit na sa Taligaman National High School sugod kaganinang buntag tungod sa paspas nga pagsaka sa tubig-baha nga mugna sa mga pag-ulan nga dala sa bagyong Uwan.
Sigon ni Kapitan Elegia Intino, apil sa mihikling ang pamilya sa usa ka balay nga totally-damaged sa landslides sa Purok 7 Sitio San Agustin ug laing duha nga partially damaged apil na ang iyang balay nga nadat-ugan sa nalukat nga kahoy’ng Falcatta.
Kadaghanan sa mga namakwit, mga residente sa Purok 1, 2, 3-B, 4-B, 5 ug 7. Sa pagkutlo niini nga balita, padayon ang pag-roving sa ilang rescue vehicle aron masuta ang mga residenteng kinahanglan nang ihikling kondiin ka-abag na nila ang mga pulis sa Butuan City Police Station 4 sa pagpahikling sa nabahaang mga residente.
Nag-anam na usab sila paghatag og report ngadto sa City Social Welfare and Development kon CSWD aron makuha ang tukmang ihap sa mga indibidwal ug pamilyang apektado nga maoy basehan sa ipanghatag nga ayuda.
