BUTUAN CITY – Pabiling gikonsidera sa Presidential Task Force on Media Security kon PTFMS nga ‘person of interest’ si Bislig City, Surigao del Sur Mayor Librado Navarro og laing dose ka mga indibidwal nga apil sa nakasuhan og grave misconduct nga miresulta sa pagpagawas og dismissal order sa Office of the Ombudsman.
Kini subay na sa pagkapatay kang Christopher Iban Lozada, station manager og anchorman sa Prime Broadcasting Network kon mas nailang Prime FM.
Sa pakighinabi sa Bombo Radyo Butuan, gipadayag ni PTFMS Chief Executive Director Undersecretary Joel Sy Egco, nga tumong niini nga makutay lang ang mga panghitabo aron mahatagan og dalan ang pagtumbok sa mga responsable.
Pursigido siyang gukdon ang mihimo sa maong kremin sa pangindahay nga mahimo pa kining dalan aron masulbad ang nangagi pang susamang mga kaso nga hangtud karon, wala’y hustisyang nakab-ot alang sa mga biktimang mediamen sa maong lalawigan.
Aminado ang opisyal nga nagsugod ang bangi sa duha ka panig niadto pang tuig 2012 dihang gikasuhan ni Lozada ang kampo sa mayor ngadto sa Ombudsman tungod sa anumalusong pagpalit sa excavator.
Apan mi-abot sa iyang kasayuran ang grabe nang away sa duha ning sayong bahin lang ning bulana dihang nakadawat na og death threat ang biktima kondiin ang ilang away ni Mayor Navarro, gipang-post na sa Facebook account ni Lozada.
Kini matud pa ang hinungdan nga si Mayor Navarro ang ilang person of interest sa pagpatay sa maong brodkaster.
Una nang gipanghimakak ni Mayor Navarro sa ekslusibong interview sa Bombo Radyo Butuan nga duna siya’y kalambigitan sa maong kremin dungan sa pagsaad nga mutabang siya sa imbestigasyon sa kapulisan alang sa dinali-ang pagresiolba sa maong hitabo, (Beth Ruiz)
