BUTUAN CITY – Gipa-ilalom karon sa modified enhanced community quarantine kon MECQ sugod karong adlawa ang Brgy. Mangagoy, Bislig City sa Surigao del Sur nga mulungtad hangtud sa Septembre 22 adlaw’ng Martes tungod sa padayong pagsaka sa ilang mga kaso sa COVID-19.
Sa eksklusibong pakighinabi sa Bombo Radyo Butuan, gipadayag ni Dr. Benjamin Chicano, information officer sa Bislig City government, hugot ang ila karong pagbantay sa maong lugar human nga mi-abot na sa 40 ng cumulative cases nila sa COVID-19 sa entiro siyudad kondiin 16 pa ang nakarekober, 21 ang aktibong kaso kon padayon pang nagpa-ayo samtang tulo na ang patay.
Tumong sa MECQ base sa gipagawas nga executive Order No. 50-2020 nga pirmado ni Mayor Florencio Garay aron malimitahan ang paglihok-lihok sa mga tawo sa maong barangay kondiin magpatuman sila og lockdown sa lugar diin natala ang mga nagpositibo sa COVID-19.
Samtang dili pa usab mudawat og mga bisita ang maong siyudad tungod sa padayon nilang pakigbisog batuk sa local transmission.
Gipasabot pa niini nga sama sa ubang mga lugar, ipa-ilalom usab nila sa 14 ka adlaw nga quarantine ang mangabot sa ilang lungsod nga gikan sa mga lugar nga makonsiderang high risk.
Sa pagkakaron, puno-puno na matud pa ang ilang mga isolation ug quarantine facilities rason nga dili una sila mangdawat og mga bisita ug turista, lokal man o langyaw.
