BUTUAN CITY – Gipahimangnuan sa Securities and Exchange Commission kon SEC-Butuan Extension Office ang publiko batok sa pagkalambigit sa duha ka bag-ong naglutaw nga investment scam nga gihimo sa mga indibidwal ug grupo nga nagtanyag og dili tinuod ug sobra ka taas nga tubo sa ibubo nga kwarta pinaagi sa bitcoin trading ug consumer goods investment.
Sigon sa Enforcement and Investor Protection Department (EIPD) sa SEC, kini mao ang Christabel Arroyo ug ang De Guzman Consumer Goods Trading – mga entities nga nagpadagan og walay otorisasyon ug iligal nga investment scheme nga naghanyag og paspas ug garantisadong kita.
Ang advisory sa SEC naglakip og mga link nga naglatid sa detalyadong impormasyon bahin sa maong mga scheme aron mapahibalo ang publiko.
Sumala sa SEC, si Christabel Arroyo pinaagi sa iyang Facebook ug Messenger accounts nangolekta og pondo gikan sa publiko alang sa gika-ingong bitcoin mining ug trading business kondiin gihanyagan niya ang mga investors nga mukita og hangtod ₱50,000 sulod sa 24 oras alang sa minimum investment nga ₱5,000.
Base sa mga report nga nakolekta sa SEC, si Arroyo nagpresentar sa iyang “investment plans” ngadto sa mga potential investors ug naghatag pa og GCash account number nga gigamit aron makolekta ang mga pondo ug ipanghatag ang payout.
Apan, giklaro sa SEC nga wala narehistro si Arroyo isip investment solicitor, broker, dealer, o agent nga gitugotan nga mamaligya og securities ubos sa Securities Regulation Code (SRC).
Samtang gi-flag usab sa SEC ang De Guzman Consumer Goods Trading, nga wala marehistro isip korporasyon o partnership ug nag-operate nga wala’y lisensya o kagahom nga mangolekta og investment gikan sa publiko.
Sumala sa EIPD, ang kalihokan sa De Guzman Trading nagdala sa mga kina-iya sa usa ka Ponzi scheme — gamit ang kwarta sa mga bag-ong investor aron bayran ang kita sa mga nauna.
