BUTUAN CITY – Naghulat pa og kumpirmasyon ang Bombo Radyo Butuan gikan sa mga hingtungdang opisyal gikan sa Department of Agriculture aron maoy mukumpirma kung nakasulod na ba dinhi sa Caraga Region ilabina sa dakbayan sa Butuan ang bird flu virus.
Kini human midangop ning sibyahan ang usa ka ginang og gipahibalo ang anam-anam nga pagkamatay sa ilang mga binuhing pato. Sa eksklusibong pakighinabi sibyahan, gibutyag ni Luzminda Enciso sa Brgy. Holy Redeemer ning siyudad, nga pagmata nila kaganinang alas-singko sa buntag, nakita nila ang pagkirig-kirig sa lima ka mga pato hangtud nga sila namatay.
Gipanulod nila kini og cellophane apil ang misunod pang laing mga pato nga karon hapit nang mi-abot sa 20 ang ilang ihap samtang ang mga wala pa mamatay apan nagluya na, ila unang gipadaplin.
Gidugang ni Enciso nga karon pa lang kini nahitabo sa ilang mga binuhing pato hinungdan nga iya kining gidangop sa Bombo Radyo.
Tinguha ni Enciso nga kung duna’y available nga tambal ang hingtungdang ahensya sa gobyerno, matambalan pa ang ubang mga buhi nilang pato. (Beth Ruiz)
