BUTUAN CITY – Padayon karun ang gihimong imbestigasyon sa kapulisan sa natigayong pagpamusil-patay bandang alas 7:20 kagabii sa may P-7 Silangan, Brgy. Bading, Butuan City.
Naila ang biktima nga si Christian Bacalso Sabisor, 40-anyos, menyu og residente sa maong dapit. Sumala ni Police Lt. Crispulo Alburo, tigpamaba sa Butuan City Police Office nga anaa lang sa gawas sa panimalay ang biktima tungod kay dunay restriction order kini ngadto sa iyang pamilya.
Niadtong higayona, napalong usab ang sugang dagitabnon sa dihang dunay naka-estorya ang biktima nga naka-single motor usab og nadungog nalang ang usa ka buto sa armas. Nakahiagum ang biktima og usa ka samad pinusilan sa ulo nga maoy hinungdan sa iyang hinanaling kamatayon.
Narekober usab sa crime scene ang usa ka sling bag nga dunay sulod sa 22 nga kalibre sa pistola ug duna pay pakete nga dunay sulod sa gitoohang shabu.
Tungod niini, nag-unang motibo karun nga gilantaw ang may kalabutan sa ilegal nga drugas human nasuta usab nga milambigit niini ang maong biktima. Sa karun pabiling gawasnon ang suspetsado.
