BUTUAN CITY – Bug-at sa kabahinan sa transport sector ning siyudad ang dakong pagsaka sa presyo sa mga produktong petrolyo ugmang adlawa tungod sa padayong giyera sa Middle East.
Sigon ni Silvestre Demetrio Jr, usa ka tricycle driver sa rutang Banza-City proper, bisan pa man sa maong sitwasyon, wala gihapon sila’y mahimo tungod kay dili man lang Pilipinas ang apektado niini kondili ang tibuok kalibutan.
Tungod matud pa niining nag-ung-ong nga bigtime price hike, mugamay unya ang ilang inadlaw-adlaw nga kinitaan tungod kay mupadulong man ang dakong bahin niini sa pagpatubog og gasolina nga masamutan pa kung igo lang nag-abang og yunit.
Apan masaligon siya nga duna’y himuong lakang ang lokal nga kagamhanan sama kaniadto nga hatagan sila og fuel subsidy aron magaan-gaanan ang ila unyang palas-anon.
Ang ila lang nga duna gihapon sila’y madala nga kita alang sa ilang inadlaw adlaw nga panginahanglanon ug maserbisyuhan ang katawhang sumasakay.
Apan bisan pa man sa dili maayong senaryo unya sa umalabot mga adlaw sa epektong mahatud niini ngadto kanila, wala gihapon sila’y planong manukot og taas tungod kay ila gihapong tamdan ang gitakda nga plitehan sa city government.
Kung duna matud pa’y mga pasaherong ganahang muhatag unya kanila og labaw sa minimum nga plitehan, mas maayo apan dili sila makapugos nga mi-demand nga usbaw niini.
