BUTUAN CITY – Padayon pa ang imbestigasyon sa kapulisan sa Sibagat, Agusan del Sur aron maila ug masuta ang motibo sa usa ka lalaki nga nang-hostage og duha ka pasahero sulod sa usa ka bus unit sa Bachelor Express Incorporated kagahapon sa alas-12:42 sa kaadlawon sa Disyembre 25, sa may Purok 2, Brgy Poblacion.
Nasuta sa inisyal nga imbestigasyon nga gikan ang bus sa Davao City ug paingon dinhi sa Butuan City, dihang pag-abot sa Bayugan City, misakay ang lalaking naka-t shirt ug naka-short pants ug nanghulga sa mga pasahero hinungdan nga misumbong ang konduktor sa maong bus ngadto sa kapulisan dihang mihunong kini duol sa estasyon.
Dihang namatikdan sa suspetsado ang presensya sa kapulisan, gihawiran na niini ang duha ka mga pasahero ug gi-hostage samtang ang ubang pasahero, daling nanaug sa bus.
Kapin usa ka oras ang gihimong negosasyon alang sa pagsurender sa suspetsado apan nanghulga kini nga iyang dunggabon ang maong pasahero kung moduol matud pa ang mga kapulisan.
Gipusil na siya sa mga pulis dihang gisulayan niya pagdunggab ang usa sa pasahero hinungdan sa iyang kamatayon.
