BUTUAN CITY – Samtang wala mitunga sa pagdungog sa House Committee on Good Government and Public Accountability kagahapong adlawa, mibisita si Besi Presidente Sara Duterte sa siyudad sa Butuan.
Pasado alas 12:00 sa udtu sa dihang midangat ang Besi Presidente sa Butuan aron pangunahan ang 89th founding anniversary sa Office of the Vice President ug awarding sa ‘Mag Negosyo Ta’ Day’ beneficiaries sa Office of the Vice President kon OVP Caraga Satellite Office.
Sigon ni Engr. Dioric Gavino, secretary General sa Sara All Movement, muabot sa 3-mil ka mga benipisyaryo gikan sa sektor sa Solo Parents, Tricycle Drivers, PWDs ug mga Senior Citizens ang nakadawat og gift packs gikan sa nagkadaiyang lugar sa Gingoog, Misamis Oriental.
Nanguna usab si VP Sara sa pagpanghatag og 507 ka mga PagbaBAGo Bags sa 57 ka mga magtutungha sa Cervantina Elementary School ubos sa PagbaBAGo: A Million Learners Campaign.
Gawas niini, gipahigayon usab ang turn-over sa OVP Caraga Satellite Office sa Mag Negosyo Ta’ Day livelihood grant nga nikantidad sa P150,000 para sa Tigao Farmers Development Cooperative alang sa ilang panginabuhian.
