BUTUAN CITY – Gipalapdan sa Philippine Health Insurance Corporation (PhilHealth) ang gihanyag nga upat ka package benefits alang sa mga miyembro nga adunay ischemic heart disease-acute myocardial infarction.
Sigon ni Dr. Israel Francis Pargas, tigpamaba ug senior vice president sa PhilHealth, ang kanhi benepisyo nga P30,000 alang niadtong nanginahanglan sa angioplasty surgery, gipatas-an ngadto sa kapin sa P500,000. Dugang pa kini sa cardiac rehabilitation nga mobalor og P60,000 ug fibrinolysis nga mokantidad og kapin sa P100,000.
Dugang nga mga benepisyo ang bayad sa pagbalhin sa ambulansya alang sa mga kinahanglan nga ibalhin gikan sa usa ka ospital nga wala’y igong kapasidad sa pagtambal sa pasyente. Gitangtang usab sa unang polisiya sa “single period of confinement”, diin ang mga benepisyo limitado kung ang pasyente ma-confine pag-usab sa susamang rason.
Samtang, gipasalig usab sa PhilHealth nga nagka-uli na ang gobyerno ug pribadong tambalanan aron maseguro nga daling masulbad ang mga utang ug magpadayon ang serbisyo ngadto sa mga miyembro.
