BUTUAN CITY – Gi-ila karong bayani ang usa ka bystander nga nakuhaan og video samtang nakiglayog sa gunman ug malampusong na-ilog ang armas gikan sa usa sa mga mi-atake sa Bondi Beach nga mikalas og 15 ka kinabuhi.
Na-trace na nga ang maong lalaki mao ang 43-anyos nga si Ahmed al Ahmed kinsa mao ang midagan padulong sa gunman ug gikuha ang iyang pusil, dayong gipunting balik sa armas ngadto sa nagdala niini hinungdan sa iyang pag-atras.
Nasuta nga si Ahmed, usa ka tag-iya sa tindahan sa prutas ug amahan sa duha ka anak, kinsa nagpabilin karon sa ospital diin siya gi-operahan tungod sa mga samad sa bala sa iyang bukton ug kamot.
Nasayrang kinse ka mga tawo ang namatay ug daghang uban pa ang angol sa pagpamusil nga nahitabo atol sa usa ka kalihokan nga gitambongan sa kapin sa 1,000 ka mga tawo alang sa selebrasyon sa Hanukkah.
Gideklara sa kapulisan nga usa kini ka teroristang insidente nga nagtumong sa Jewish community.
