BUTUAN CITY – Padayong misaka ang kwartang misanong sa fundraising campaign nga gihimo sa usa ka Australian citizen alang sa gibansagang Bondi hero sa Sydney nga si Ahmed Al-Ahmed kinsa misikat tungod sa iyang paglayog ug pag-ilog sa armas nga gigamit pagpamusil sa usa sa duha ka mga gunmen nga si Sajid Akram, nga mikalas og 15 ka mga tawo.
Sa eksklusibong pakighinabi sa Bombo Radyo Butuan, gipadayag ni Bombo international correspondent to Sydney, Australia Denmark Suede nga ang instant hero kinsa usa ka Muslim, anak sa usa ka Syrian refugee ug ang iyang gipakitang pagkabayani, pamatuod lang sa gugma niya sa iyang adoptive country.
Tungod sa iyang gihimo, gibuak matud pa ni Ahmed ang stereo-type nga nosyon sa daghang mga tawo nga ang Muslim makutay sa terorismo. Gikan matud pa sa 300,000-Australian dollars nga unang gihangyo sa organizer aron ihatag kang Al-Ahmed isip hinabang tungod kay dili na makatabaho human napusilan ang iyang kamot, karon hapit nang mi-abot sa 3-million Australian dollars ug gila-umang musaka pa.
Dugang pa ni Suede, gibisita na si Al-Ahmed nila Australian Prime Minister Anthony Albanese ug ni New South Wales Premier Chris Minns ug personal nga gipasalamatan sa iyang mabayanihong aksyon nga nagluwas sa posibleng dugang pa unta nga mga casualties kung wala niya malayog ang amahan nga si Sajid Akram.
Kung wala matud pa kini gihimo ni Ahmed, dakong isyu na usab kini ngadto sa Muslim community rason nga daghan sa ilang komunidad sa mga Muslim ang mihatag og ayuda nga alang kaniya.
Sa katapusan, nanawagan usab si Suede sa gobyerno sa Pilipinas nga magpagawas og pamahayag kalabot sa pag-train sa mag-amahang Akram dinhi sa Pilipinas tungod sa mahatag matud pa niining dako nga epekto sa imahe sa nasud human nga duna siya’y ka-uban sa trabaho kaniadto nga Australyano ang naghuna-huna nga hotbed matud pa sa mga Islamic State of Iraq and Syria kon ISIS terrorists ang Metro Manila.
