BUTUAN CITY – Gibulgar ni Navotas Rep. Tobias ‘Toby’ Tiangco nga mi-abot sa gibana-banang kapin sa 17-bilyunes pisos nga alokasyon ang pundong konektado kang kanhi House Appropriations Chair Rep. Zaldy Co kondiin siya ang mga proponent inay nga ang kongresistang anaa sa distrito diin ipatuman unta ang kontrobersyal nga mga proyekto.
Kini atol sa motu propio inquiry in aid of legislation kalabot sa isyung gibansagan sa maong komite of ‘Philippines Under Water.’ Nasayrang usa si Rep Tiangco sa pinaka-vocal nga mga magbabalaud nga mibatikos sa flood control projects sa Department of Public Works and Highways (DPWH).
Sa iyang pag-atubang sa komite kaganinang buntag, apil niini ang ₱2.295B nga gitagana alang sa Ako Bicol Party-list; ₱2.064B alang sa Barangay Health Workers Party-list; ug ₱13B kansa direktang gilambigit mismo kang Co.
Kini matud pa ang hinungdan nga atol sa pagdungog sa Kamara sa susamang isyu, gibarugan niya ang pagpatawag kang Rep Co sa mga imbestigasyon tungod kay siya lang matud pa ang makapasabot sa maong mga kontrobersiya apan gibabagan ni Rep Benny Abante.
Gidepensahan usab ni Tiangco ang mga flood control projects sa Navotas, human siya gi-alegahan ni Rep. Alfredo Garbin kalabot matud pa sa mga budget insertions ug kwestyunableng flood control projects sa Navotas.
Gibutyag niini nga ang mga flood control projects sa Navotas pulos importante, tungod kay vulnerable man ang ilang siyudad sa pagbaha tungod sa ilang lokasyon nga duol sa Tullahan River ug ubos sa sea level higayong magtaob ang dagat.
Gibutyag usab niini nga karong Marso lang ning tuiga niya nasayran ang grabe kadako nga budget insertions nga gihimo sa mga magbabalaud nga apil sa bicameral conference pinaagi sa pagtangtang sa mga priority projects ni Pangulong Bongbong Marcos.
