BUTUAN CITY -Malinawon ug balik na sa normal ang kinatibuk-ang Israel sukad gipatuman ang ceasefire tali nila sa Iran kondiin nakatulog na sila og sakto ning mi-aging gabii tungod sa kawala na’y mga missiles nga gitira sa Iran ngadto sa maong nasud.
Sigon ni Bombo international correspondent Rhemy Estrada-Calimlim direkta gikan sa Haifa, Israel, sa unang pagdeklara sa ceasefire napalaw sila tungod kay dihang nangabli na sila sa mga bintana sa ilang bomb shelter mitingog pa man ang bomb alert sa ilang cell phones rason nga naglumba na usab sila og tago.
Dali pa usab niyang gidala padulong sa bomb shelter ang gi-atiman niyang amo bisan og nahinanok na kini pagkatulog aron usab masiguro ang kaluwasan niini.
Apan dihang nabati na gayod nila nga tinuod na ang ikaduhang ceasefire nga gipatuman, dinhi na mibalik sa normal ang tanan.
Tungod niini, bukas na ang tanang establisamiento apan kinahanglan pa gihapong alerto ang tanan ug dala nila kanunay ang ilang cell phone bisan asa sila padulong. Kini aron masayod sila higayong magpadala na og bomb alert ang gobyerno sa ingon makasulod gilayon sa bomb shelter.
Kini ilabina nga mudagan lang og pila ka minutos human sa ilang pgdawat sa alert, mabati gilayon nila ang mutugpa nga bomba.
