BUTUAN CITY – Ubay-ubay nga mga empleyado sa National Food Authority kon NFA ang nag-atubang karon og mga kasong administratibo human nadiskubrehan ang ubay-ubay nga mga iregularidad base na sa gilusad nga subsob nga internal audit.
Sa eksklusibong pakighinabi sa Bombo Radyo Philippines, gipadayag ni NFA administrator Dr Larry Lacson nga sukad siya milingkod sa katungdanan niadtong Marso ning mi-aging tuig 2024, naglusad gilayon siya ug imbestigasyon pinaagi sa ilang Internal Audit Department ug dinhi nadiskubrehan ang mga dili otorisadong transaksyon; mga diskrepansiya sa mga records sa ilang mga warehouses; pagkunhod sa stocks sa bugas nga lapas na sa tolerable level nga 2 hangtud sa 3-porsientong loss threshold.
Anaa pa ang pagpasagad ug misconduct sa mga food security operations.
Sigon ni Lacson, mi-abot na sa 25 nila ka mga empleyado ang gipa-ilalom sa preventive suspension; 32 ang gipasakaan na og mga kasong administratibo samtang 54 usab ang na-isyuhan og mga show cause orders.
Apil sa mga na-suspend ang mga branch managers, assistant managers, warehouse supervisors, ug mga staff gikan sa mga rehiyon sa Cagayan Valley, Central Luzon, Calabarzon, MIMAROPA kon Mindoro, Marinduque, Romblon ug Palawan; Bicol, ug Western Visayas.
