BUTUAN CITY – Gimando ni Pangulong Ferdinand ‘Bongbong’ Marcos Jr nga i-livestream sa Kamara ug Senado ang bicameral conference alang sa 2026 national budget.
Gipadayag sa pangulo nga sa pagkakaron, wala niya nakita nga kinahanglang i-veto ang nasudnong budget tungod kay apil matud pa siya sa nagplastar kaniadto sa National Expenditure Program kon NEP kondiin nasaksihan niya ang pagpangandam alang niiini.
Wala matud pa siya’y nakitang proyekto nga wala nakalinya kon batuk sa gi-asdang nga socio-economic development plan sa administrasyon.
Sigon sa pangulo, wala na ang small committee nga maoy gihimo sa mga magbabalaud sa Kamara atol sa 19th Congress dayong butyag nga mas maayong hulaton unang matapos ang pagtuki niini sa himuong bicameral conference committee tungod kay wala pa matapos ang proseso ug daghan pa kini og agi-an.
Gipalipay usab sa pangulo nga subli na usab nga gibuksan ngadto sa publiko ang SALN kon Statement of Assets and Liabilities and Networth human gitangtang sa Ombudsman ang mga restrictions niini. Andam matud pa siyang buksan ang ilang SALN kung pangayuon kini sa Independent Commission for Infrastructure kon ICI apil na sa Ombudsman.
Nagtuo ang presidente nga angayan lang buksan ang SALN sa mga government officials aron malikayan ang bisan unsa mang mga pagduda ilabina nga wala pa mahuman ang imbestigasyon sa mga anumalusong flood control projects.
