BUTUAN CITY – Apil ang dakbayan sa Butuan ug mga lalawigan sa Caraga Region sa nationwide launching sa ‘Benteng Bigas Meron na’ kon BBM rice nga gibaligya karong adlawa, atol sa ika-68 nga adlawng natawhan ni Pangulong Ferdinand ‘Bongbong’ Marcos Jr.
Ang BBM rice, produkto sa Rice Contract Farming Program sa National Irrigation Administration kon NIA ug sa Department of Agriculture kansa gipalit sa publiko sa presyong 20-pisos kada-kilo, mas ubos kumpara sa regular nga presyo sa merkado.
Sigon ni Lyn Pareñas, hepe sa Agribusiness and Marketing Assistance Division kon AMAD sa Department of Agriculture-Caraga, usa kini na nasudnong kalihukan nga gilusad sa tanang lalawigan sa nasud.
Gisuportahan usab kini sa mga lokal nga mag-uuma ug aron masiguro ang makaya sa presyo nga bugas alang sa tanan. Birthday gift matud pa kini alang sa katawhan nga nasubay sa iyang tinguha nga wala’y gutom nga Pilipino.
Gila-umang mu-abot sa 7-mil ka mga Caraganons ang makapalit sa maong bugas ning adlawa sa entiro rehiyon. Ang maong ihap, gibahin-bahin na sa tanang lalawigan sa rehiyon sama sa Agusan del Norte ug Sur, Surigao del Norte ug Sur ingon man sa Dinagat Islands province.
