BUTUAN CITY – Tungod sa dili madawat nga kapakyasan sa gugma human gibuwagan sa iyang hinigugma, mas gipili sa usa ka 17-anyos nga bayong-bayong nga taga-Buenavista, Agusan del Norte ang pagkutlo sa iyang kinabuhi gamit ang airgun.
Sigon ni P/S. Insp. Benjamin Balingan, deputy chief sa Buenavista municipal Police Station, nagtuo ang uyu-an sa biktimang si John Paul Javier, nagpuyo sa Sitio Tamosan, Purok 7, Brgy. Alubihid sakop sa maong lungsod nga ang pakigbuwag sa babaye maoy hinungdan sa pagpusil sa iyang pag-umangkon sa iyang kaugalingon gamit ang airgun.
Gibutyag sa opisyal nga tungod kay wala gitaho sa ilang buhatan ang maong hitabo hinungdan nga ila pang gi-imbestigahan ang nasangpit nga insidente aron makumpirma kung wala ba kini foul play.
Nasayrang natigayon matud pa ang maong insidente sa usa ka payag diin gibutyag ang airgun nga gipanag-iyahan og anaa na sa kostudiya sa iyang uyuan nga si Eliseo Oliverio.
Na-ilo na sa iyang mga ginikanan ang biktima og gi-atiman sa iyang iyaang si Gresilda Bagnol nga taga-Brgy. Manapa diin gihaya ang patay’ng lawas sa biktima. (Beth Ruiz)
