BUTUAN CITY – Nagpadayag sa iyang kadismaya si Bayan Muna partylist Rep. Ferdinand Gaite sa matud pa, balik-balik ug wala’y basehang akusasyon nga ang ilang partylist uban sa lain pang uban nga ilalom sa Makabayan bloc, mga legal fronts sa Communist Party of the Philippines-New People’s Army-National Democratic Front kon CPP-NPA-NDF.
Sa eksklusibong pakighinabi sa Bombo Radyo Butuan, gipadayag ni Congressman Gaite nga wala na’y laing nakita nga paagi si Pangulong Rodrigo Duterte apil na ang iyang mga ahensya sa kagamhanan sama sa Philippine National Police, Armed Forces of the Philippines kon AFP ug National Intelligence Coordinating Agency kon NICA kung mapildi sa sa pagdepensa sa nagkada-iyang isyu, kondili ang pagtawag na lang ug bisan unsa nga pangalan ngadto kanila.
Angayan matud pa nga ang tutukan ni Pangulong Rodrigo Duterte mao ang mga nag-unang problema nga gisagubang karon sa katawhan sama sa mahal na kaayo nga presyo sa mga produktong petrolyo ug mga palaliton kaysa magsige lang matud pa og pamasangil.
Samtang gikataw-an lang sa kongresista ang alegasyong napadulong lang sa walhong kalihukan ang pundong gikan sa gobyerno alang sa ilang Makabayan coalition dungan sa pagklaro nga wala na matud pa sila midawat sa pundo human nabulabog nga ang pundo kaniadto sa Priority Development Assistance Fund kon PDAF, nahurot lang sa kurapsyon.
Hagit niini sa kanunay mag-alega kanilang front sila sa terorismong kalihukan ug didto mipadulong ang pundo sa gobyernong ilang makuha, nga kasuhan sila og duna’y ilang ebidensya aron mapamatud-an kung tinuod ba ang ilang alegasyon.
