BUTUAN CITY– Gikumpirma ni Senador Ronald ‘Bato’ de la Rosa nga gikan sa iyang buhatan ang gipatuyok nga kopya sa usa ka draft resolution nga nagtumong pagbasura sa impeachment complaint batok kang Bise Presidente Sara Duterte.
Aminado ang senador nga siya ang nag-initiate sa maong resolusyon nga ideklarang “de facto dismissed” ang reklamo tungod kay milapas na sa 100 ka mga adlaw sukad kini gidala sa Senado ug wala gayo’y kalambuan. Nasayrang gikatakdang mo-adjourn ang ika-19 nga Kongreso karong Hunyo 14.
Sumala sa draft, dili na mahimo nga i-carry over ang impeachment trial sa sunod nga Kongreso tungod kay separate worlds matud pa ang 19th ug 20th Congress. Sigon ni Senador Bato, duna na’y pipila ka mga ka-ubanan niyang Senador ang misuporta sa maong draft resolution apan wala na niya gibutyag pa ang ihap niini.
Sa pagkakaron, dili pa matumbok sa senador kung kanus-a niya kini iduso tungod kay iya pa kining susihon og maayo.
Samtang gi-angkon usab ni Senador Jinggoy Estrada nga nakadawat siya og pisikal nga kopya sa draft senate resolution nga nagtinguhang i-dismiss ang impeachment case sa besi presidente.
Gibutyag sa senador nga niadto pang Lunes mikaylap ang maong resolusyon dungan sa pagklaro nga wala kini papirmahi kaniya kondili gipabasa lang ug iya pang huna-hunaon og maayo kung mupirma siya niini o dili.
Bisan si Senadora Imee Marcos mikumpirma nga nakita niya ang mikaylap nga draft senate resolution alang sa maong katuyuan. Gibutyag niini ikatulo na kini nga resolusyong iyang nakita aron i-dismiss ang pagtaral sa impeachment case batuk sa besi presidente.
Daghan matud pa kini nga bersyon ug daghan pang draft rsolutions nga managlahi matud pa ang katuyuan. Ang tanang bersyon sa resolusyo, nangita og pinakamaayong bisa, pinakaha-um sa balaud ug wala’y sayop nga resolusyon pabor kang Duterte.
Nakita usab ni Senador Joel Villanueva ang kopya sa resolusyon sa ilang group chat apan wala gipadala nga physical copy niini sa iyang opisina aron ipabasura ang impeachment case batuk kang VP Sara.
