BUTUAN CITY – Wala damha sa usa ka illegal recruiter nga gikan pa sa Batangas nga ang iyang pagdayo dinhi sa siyudad sa Butuan maoy magsilbing dalan aron maputol na ang iyang pagpang-scam og dagkong salapi bugti sa saad nga patrabahuon sa Canada.
Kini human ang malampusong entrapment operation nga gilusad sa ginsakpan sa National Bureau of Investigation kon NBI-Caraga human midangop sa ilang buhatan ang na-ilad niini nga si Jeffrey Maxino, higkod ang edad, minyo, usa ka tricycle driver ug residente sa Brgy. Bading ning siyudad.
Samtang naila ang nasikop nga si Melight Esguerra, taga-Batangas, kinsa asawa sa anak sa kumagbos sa uyuan sa asawa ni Maxino. Gihimo ang operasyon pasado alas-4:00 kagahapon sa hapon sa usa ka coffee shop ning siyudad.
Sa eksklusibong pakighinabi sa Bombo Radyo, gibutyag ni Maxino nga sukad naghanyag og trabaho sa Canada ang suspetsado, mi-abot na sa P750,000.00 ang napangayo niini nga kwarta kay gamiton matud pa sa pagproseso sa iyang mga papeles apil na sa plane ticket.
Gihimo ang entrapment operation human nga nangayo na usab og katapusan matud pa nga P100,000.00 ang suspetsado apan wala gihapo’y klaro ilabina nga nabaligya na ang iyang yuta ug ang de-pasayruang traysikol.
