BUTUAN CITY – Napa-ilawom na sa pyschological debriefing ang bata human naluwas gikan sa halos tulo ka oras nga hostage drama sulod sa usa ka bus sa Brgy. Lipata, Surigao City, Surigao del Sur kagahapon.
Mahinumdumang natapos lang ang maong insidente human gipusil-patay ang suspetsadong si Michael Belarma Puerto Gallera, 40 anyos nga taga-Bantal, Banlag, Valencia City, Bukidnon.
Sa ekskusibong pakighinabi sa Bombo Radyo Butuan, gibutyag ni P/Lt. Col. Christian Rafols, Chief of Police sa Surigao City, pasado alas-onse pa lang sa buntag dihang girespondihan nila ang hostage drama sulod sa bus sa Lipata nga isakay na unta kini sa Ro-Ro vessel.
Sigon sa mga pasahero, kalit lang misaka sa naka-standby nga bus sa Surigao Transportation Corp., si Gallera dayong gakos sa bata ug giti-unan sa dala niining kutsilyo hinungdan nga nanganaog ang ubang pasahero.
Dugang ni Col. Rafols nga gipa-uyon uyonan na nila ang suspek aron lang nga buhian niini ang biktima apan pag-abot sa alas-2 sa hapon nabutang na sa alanganin ang bata dihang nakitang desidido si Gallera nga patyon ang biktima.
Nakakita og higayon ang kapulisan aron mapalingkawas gikan sa kamot niini ang bata apan misukol matod pa ang suspek nga miresulta sa pagka- angol sa usa ka pulis hinungdan nga nakadesider ang kapulisan pagpusil kaniya.
Gihatagan gilayon kini og medical attention sa naka-standby nga medic apan nabugtuan gihapon sa hinulamang kinabuhi samtang luwas nga nakuha ang bata nga anaa karon sa pag-atiman sa City Social Welfare and Development kon CSWD samtang gihaya usab ang patay’ng lawas ni Gallera sa usa ka punerarya sa maong siyudad.
