BUTUAN CITY – Napalgan na kagahapong adlawa ang lalaking nalumos samtang naligo sa usa ka resort sa Barangay Lawigan, Bislig City. Naila ang biktima nga si Nathaniel Balcita, 22-anyos nga taga Trento, Agusan del Sur.
Nasayran nga naligo ang biktima kauban ang hinigugma niini nga si Sandra Marie Ramiso, 22 anyos, nga taga Malita, Davao Occidental niadtong Sabado, Enero 14. Apan nadala sa dagkong balod ang duruha hinungdan sa pagkalumos.
Nahaw-as ang babaye niadtong higayona nga daling gitabang og gidala sa ospital apan gideklarang dead-on-arrival samtang gipangeta ang uyab niini.
Kagahapon sa buntag sa gihimong Retrieval operation sa Team Bislig Coast Guard, hingpit nga narekober ang patay’ng lawas sa lalaki.
Una nang gisirado ang mga beach sa lugar atol sa gihimong retrieval operation.
Samtang gipulong usab ang mga tag-iya sa beach resort ni Bislig City Councilor Reynaldo Dominguez aron malikayan na ang susamang panghitabo.
