BUTUAN CITY – Desidido ang usa ka inahan nga mopasaka ug kaso batuk sa sundalo nga maoy gitudlong hinungdan sa pagkamatay sa iyang usa ka tuig pa lang nga anak human kini nasunog kauban ang iyang manghod mga alas 5:30 sa hapon.
Sumala pa ni Mae Ann Manggumihay, nga taga Sitio Salaysayon, Barangay Jaguimitan, Nasipit, Agusan Del Norte, mibisita siya sa balay sa iyang amahan sa may Purok-6 Barangay 3, lungsod sa Buenavista sa samang probinsiya diin nahitabo ang insidente.
Nagtubil matud pa og gasolina nga gisulod sa bottled water ang iyang manghod nga si Angelie Mangubalas, sa single motor samtang nag-gara-gara matud pa ug kadlit sa iyang lighter ang sundalo nga si PFC Dan Mayostaquio sa 23rd Infantry Battalion nga sood na usab sa iyang amahan ug bana nga CAFGU.
Saysay pa niini nga katulo mikadlit sa lighter ang sundalo adiser misilaab ang gasolina hinungdang nasunog ang iyang manghod ug ang iyang anak nga na-atol nga naghawid sa short sa dalaga.
Sa tumong nga mapalong ang nagsilaab nga lawas sa duha ka mga biktima, gilambos matud pa kini sa maong sundalo didto sa koral adiser na didto sa sagbutan sa luyong bahin sa ilang panimalay apan napalong lang kini sa dihang gitabangan na sa mga silingan.
Pagbutyag pa sa inahan nga halos 50 porsiento sa lawas sa iyang anak ang nasunog apil na sa iyang manghod hinungdang daling gidala sa Agusan Del Norte Provincial Hospital nga gi-refer usab ngadto sa Davao City. Mikuyog usab ang maong sundalo sa pagpa-ospital sa mga biktima.
Apan paglabay sa 12 ka adlaw, nabugtuan sa gininhawa ang anak tungod sa impeksiyun sa mga paso sa kalawasan.
Hinoon mitabang matud pa ang kasundaluhan sa 23rd IB ug probinsiyal nga kagamhanan hangtud sa pagpalubong sa iyang anak. Apan giklaro sa inahan nga isunod na nila ang pagpasaka ug kaso batuk sa maong sundalo. (Rolan Janea)
