BUTUAN CITY – Opisyal nang nanumpa si Davao City Mayor Sebastian “Baste” Duterte isip bag-ong presidente sa Partido Demokratiko Pilipino (PDP) atol sa gihimong National Council Meeting sa partido niadtong Domingo, Abril 12, 2026.
Sumala sa mga opisyal, ang iyang pagkahimutang sa posisyon nagsimbolo og dako nga kausaban sa liderato sa partido samtang ilang gipalig-on ang direksiyong politikal ug estruktura sa organisasyon alang sa umaabot nga mga tuig.
Mitambong usab sa maong panagtigom ang pipila ka mga nag-unang lider sa partido, lakip sila si Senador Christopher “Bong” Go, uban nila si Sen. Robin Padilla, 1st District Rep. Leandro Leviste, kanhi Executive Secretary Vic Rodriguez, kanhi Press Secretary Trixie Cruz Angeles, ug SAGIP party-list Rep. Paolo Marcoleta.
Sa maong pulong, subling gipalig-on sa mga lider sa partido ang ilang panaghiusa ug dedikasyon sa pagserbisyo sa publiko.
Gipahayag usab sa PDP ang ilang pagsalig nga sa pagpanguna ni Duterte, mapadayon ang adbokasiya sa inclusive development ug responsable nga pangdumala alang sa nasud.
Hinumdoman nga ang maong posisyon kaniadto gihuptan ni Robin Padilla.
