BUTUAN CITY – Sangko sa langit ang pagpasalamat sa tanang mga triplante sa usa ka cargo vessel tugod sa ilang pagkaluwas human mitikla-ob ang maong barko pasado alas-otso kagabii.
Sa inisyal nga impormasyong nakuha sa Bombo Radyo gikan kang Sugbongcogon Mayor Mildred Lagbas, duna’y kargang 13,500 ka kahong beer ang maong barko nga gikan sa lungsod sa Opol, Misamis Oriental ug pa-uli na unta sa lungsod sa Dapa, Siargao Island sa Surigao del Norte apan paglabay sa tulo ka oras, gihapak na sa dagkong balud ang barko hangtud nga mitikla-ob kini sa kadagatan sa lungsod sa Sogbongcogon.
Naluwas ra sila sa mga mangingisda, mga personahe sa Philippine Coast Guard, kapulisan ug sa Sugbongcogon Municipal Disaster Team didto sa Sitio Mindalama, Purok 6, Brgy. Mangga sa maong lungsod ug gidala sa isolation area sa Brgy. Quiraging diin sila nagpalabay sa kagabhion.
Sa pagkakaron, gip-ilalom una sila sa rapid test human nakatulog kagabii sa maong lungsod dihang giplastar ni Mayor Mildred Jagbas.
