BUTUAN CITY – Padayon pa karun ang imbestigasyon sa kapulisan aron mailhan ang riding-in-tandem suspects nga mipusil-patay sa usa ka barangay electrician kaganina mga alas 6:00 gabii sa may Purok-1, Barangay Obrero ning siyudad sa Butuan.
Naila ang biktima nga si Abel Antido, 58-anyos, menyu ug residente sa maong dapit.
Sumala pa sa iyang asawang si Maryann Antido, dunay nangeta sa iyang bana samtang siya anaa sa ilang tindahan.
Sa dihang migawas na ang iyang bana gikan sa ilang balay, dinhe na siya gipusil diin nakahiagum ug tulo ka samad pinusilan sa lawas.
Dali kining gidala sa usa ka pribadong ospital apan gideklarang dead on arrival.
Gibutyag pa sa asawa nga kung makita lang niya pag-usab ang suspetsado, seguradong mailhan niya kini ilabina ang kadtong nagmaneho sa motor nga wala nakasoot ug helmet.
Gipahayag usab ni Maryann nga na-anad na siyang dunay mangeta sa iyang bana tungod kay usa man kini ka electrician.
Wala usab nakahisgut matud pa ang biktima nga duna kini nadawat nga hulga sa kinabuhi.
Samtang gikumpirma usab ni Kapitan Fernand “Dondi” Rivero nga kanhe nang misurender tungod sa ilegal drugs ang biktima niadtong panahon pa sa kanhe kapitan.
Apan sa karun wala kini kasayuran kung nagpadayon ba kini sa iyang bisyu hinungdang dili niini matumbok kung dunay kalabutan ba sa drogas ang maong pagpamusil.
