BUTUAN CITY – Ipatuman na karong tuiga sa tanang police stations sa Butuan City Police Office kon BCPO ang barangay drug clearing operations nga mulungtad hangtud sa buwan sa Hunyo ning tuiga.
Sigon ni P/Chief Insp. Paul Paden, nakadawat sila og marching order nga pag-abot sa Hunyo ning tuiga, madeklara nang drug free ang kabaranggayan ning siyudad. Kini pinaagi na usab sa tagsa-tagsa ka mga station commanders base na usab sa parameters nga gihatag sa Dangerous Drugs Board.
Apil niini ang pagpa-ilalom sa mga drug surrenderees sa usa ka drug rehabilitation program og dili lang diha sa komunidad tungod kay kung diha lang sila sa komunidad, dako ang posibilidad nga mubalik pa sa ilang na-andang bisyo ang nasangpit nga mga drug personalities.
Samtang sa nagpadayon nilang pagpatuman sa kampanya batuk sa ginadiling druga, giklaro sa opisyal nga duna pa sila’y gipanubayang onse ka mga kaso sa kamatayon kon death under investigation.
Kini mas ubos kung ikumpara sa ubang mga siyudad sa nasud diin halos kada-adlaw duna’y gipamatay nga gidudahang drug personalities nga binuhatan sa mga riding in tandem suspects. (Beth Ruiz)
