BUTUAN CITY – Gikumpirma ni Atty Jinky Zaragosa-Ang, acting manager sa Butuan City Airport nga nakabase sa Brgy Bancasi, nga tulo sa ilang mga airport personnel ang gitangtang na sa trabaho human nagpositibo sa gilusad nga random drug test.
Sa eksklusibong pakighinabi sa Bombo Radyo Butuan, gipadayag ni Atty Ang nga tinuig nga gilusad sa Civil Aviation Authority of the Philippines kon CAAP ang surprise random drug test aron masiguro nga drug-free ang tanang tugpahanan sa tibuok nasud.
Sa tanang airports nga gihimo ang drug tests, unom ka mga personahe ang nagpositibo kondiin tulo niini dinhi sa Butuan City nga gilangkuban sa duha ka mga job order personnel ug usa ka outsourced employee.
Gihimo matud pa ang random drug test niadtong buwan sa Hulyo sa kapin usa ka gatus ka mga naka-duty gikan sa kapin 200 nga mga empleyado.
Tungod sa mga nagpositibo, blangko pa ang opisyal kung duna ba’y lain pang drug test nga himuon karong tuiga.
Gipaniguro sa opisyal nga timaan kini nga drug-free ang Butuan City Airport ug wala’y angayang kabalak-an ang publiko ilabina ang mga sumasakay.
Sa pagkakaron, terminated na sa ilang trabaho ang maong mga empleyado isip pagsunod sa patakaran sa CAAP.
