BUTUAN CITY – Dako kaayo ang kalipay ni Jasferjay Samoya, magna cum laude ug alumna sa Caraga State University human nga ika-walo siya sa top 10 sa Licensure Examination for Teachers kon LET 2025.
Sa eksklusibong pakighinabi sa Bombo Radyo Butuan, iyang gisaysay nga adesir siya mikuha sa Bachelor of Science and Secondary Education Major in General Science, gikan pa siya sa BS Biology program hangtud nga mibalhin siya sa education. Bisan irregular student siya ug lima ka tuig siyang nagtungha sa CSU, wala kini nahimong babag sa iyang kalampusan.
Saysay pa ni Samoya, challenging kaayo ang review season tungod kay didto nasukod ang ilang stamina gikan sa mental og physical health ilabina nga kinahanglan ang pakig-socialize sa ubang studyante hinungdan nga usahay ma-ulahi sila sa ilang klase.
Dugang pa ni Samoya, lahi ra ang “expectation versus reality” sa board exam tungod sa pressure nga makita sa ubang examinees hinungdan nga daghang kasagarang natun-an ang mawala pag-abot sa aktuwal nga exam.
Alang kaniya, naghimo siya og mantra sa kaugalingon nga dili pwede nga unahon ang kakulba ug kinahanglan nga mapildi ang pressure nga maoy nakatabang aron mamunga ang iyang paningkamot.
Kampante usab siya nga makapasar, apan wala gyud niya damha nga mahimong usa siya sa mga topnotchers.
Gi-ila usab ni Samoya nga dako kaayo og papel ang suporta nga iyang nakuha gikan sa iyang pamilya kinsa klarong proud kaniya ilabina ang iyang mga ginikanan ug iyang amahan nga usa ka bao-bao driver, mga maestra, tunghaan, ug mga higala, lakip na ang iyang lig-on nga pagsalig sa Ginoo, sa kalampusan nga iyang nakab-ot isip bag-ong milestone sa iyang kinabuhi.
