BUTUAN CITY- Masubo ug naglibog si Analou Sedello kung unsaon pagbuhi sa iyang 4 ka anak human sa pagkamatay sa iyang bana niadtong miaging semana.
Si Analou mao ang ikatulong mananaog sa 1-2 Panalo Part 24 Promo sa Bombo Radyo Butuan bugti sa ₱50,000.
Sumala ni Sedello, giimbitar matud pa sila sa ilang silingan sa pagsaulog sa adlawng natawhan sa usa ka beach sa Caasinan, Cabadbaran.
Didto, nag-inom ang iyang bana uban sa mga barkada daplin sa baybayon nga medyo layo sa ilang cottage.
Tungod sa kalingawan, nagtuo ang mga barkada nga nagbinuang lang ang biktima sa pagkalumos kay tuhod ra ang kalalum sa tubig.
Apan sa dihang gisultihan sila sa silingan nga wala na kini makalihok, didto pa sila nakahibalo nga seryoso na ang kahimtang ug dali nilang gitabangan ug gidala sa ospital.
Natabangan pa ang bana ni Analou, apan pagkasunod adlaw namatay kini tungod kay nakakaon og daghang balas ug na cardiac arrest.
Dugang pa, tungod sa kusog nga bagyong Ada ug sa pagbaha sa Los Angeles diin nagpuyo ang pamilya Sedello, nabahaan ang ilang balay.
Mao nga gibalhin nila ang haya sa bana ni Analou sa covered court.
Sa pagkakaron nalubong na ang bana niini.
