BUTUAN CITY – Gipanghimakak ni Police Regional Office kon PRO-13 regional director Chief Supt. Rolando Felix ang nanggawas karong impormasyong duna’y nakasulod nga mga armadong kalalakin-an dinhi sa Caraga Region.
Sa eksklusibong interbyu sa Bombo Radyo, gipadayag sa opisyal nga base na usab kini sa iyang pagpakig-alayon sa ilang counterpart, ang kasundaluhan. Kini ang giklaro sa opisyal subay na sa nanggawas karon sa social media nga gikan matud pa sa 10th RCDG ang maong impormasyong pirmado sa usa ka opisyal hinungdan nga matu-uhang usa ka classified information.
Gidugang ni Gen. Felix nga gisusi na sa kasundaluhan ang nasangpit nga impormasyon aron masayran ang authenticity niini.
Samtang aron masegurong wala’y teroristang grupo nga makasulod sa Caraga, gibutyag sa opisyal nga nagpadayon ang ilang pag-alerto og ang pagpahigayon og mga check points ka-uban ang kasundaluhan.
Gitabangan usab nilang ma-secure ang tanang mga regional borders partikular ang kadagatan pinaagi sa limitadong pagpatrolya. (Beth Ruiz)
