BUTUAN CITY – Padayon karung nanguha og ebidensiya ang kapulisan aron mailhan ang mga personalidad nga lakip sa miransak sa panimalay sa incumbent vice mayor sa San Miguel, Surigao Del Sur kagahapon sa alas 3:45 sa hapon sa may barangay Siagao sakop sa maong lungsod.
Sigon ni PCapt. Renz Manriquez, Hepe sa San Miguel Municipal Police Station, gisulod sa gibana-banang 30 ka mga armado sa tag-as nga kalibre sa armas ang panimalay ni Vice Mayor Rolmar Basalan, kansa midagan pagka-mayor. Sumala sa hepe nga wala sa balay niadtong higayona ang opisyal diin nabilin sa balay ang anak lang niini og asawa.
Nakuha matud pa sa armadong grupo ang usa lang ka pistola og wala nay lain pang gamit samtang walay nasakitan usab sa maong insedente. Giklaro pa ni PCapt. Manriquez nga lisud pamatud-an ang alegasyon nga dunay goons ang besi mayor tungod kay personal nga gamit niini ang pistola nga nakuha kansa rehistrado pa.
Sa karun, gipangsusi na nila ang mga CCTV Footages sa lugar alang sa posibleng pagtumbok sa mga personalidad nga mihimo niini. Apan gipaneguro sa opisyal nga dili kini maka-apektu sa umaabot nga election dayung pagsaad sa katawhan nga magpahigayon sa hapsay og luwas nga election karung umaabot nga Mayo 9..
Apan sa kabahinan ni Ka Sandara Sidlakan, nagpailang tigpamaba sa NPA-Surigao, gipamugos niining nagtiner og mga armas si besi mayor Basalan uban sa mga goons nga maoy rason sa ilang pag-ransak sa panimalay niini.
Sumala ni Ka Sandara nga daghan pang pulitiko ang dunay mga armas og nataymingan lang nga si Basalan ang pabor sa himoong pagronda. Sukwahi sa pagbutyag sa kapulisan, nakuha matud pa sa walhong grupo ang 2 ka punto 45 nga pistola, usa ka M16, mga handheld radios og uban pang gamit.
