BUTUAN CITY – Gi-ransak sa gitoohang mga rebelding New People’s Army kon NPA ang panimalay sa Vice Mayor sa lungsod sa Cortes, Surigao Del Sur kagahapon sa alas 6:45 sa buntag diin dunay mga armas ang nalimas.
Sa pakighinabi ning sibyahan kang P/ Sr. Insp. Clark Abiya, hepe sa Cortes Municipal Police Station, gibana-bana ni Vice Mayor Emmanuel Suarez nga halos 30 ka mga miyembro sa Guerilla Front Committee 30 sa NPA ang mi-adtu sa ilang lugar diin duha sa mga niini ang misulod sa panimalay ug gitangag ang 2 ka unit sa .45 nga kalibre sa pistola, usa ka shutgun ug usa ka Ingram.
Kauban ni Vice Mayor niadtong higayona ang iyang apo ug katabang diin swerteng wala sila gipasakitan sa mga responsible.
Sa pakig-estorya matud pa sa mga rebelde ngadto sa bise mayor, nahisgutan niini ang pagban sa pagpanagat sa ubang kalungsuran sa kadagatang sakop sa Cortes lakip na ang kuyanap nga illegal logging sa kabukiran. (Rolan Janea)
