BUTUAN CITY – Aprubado na sa Committee on Local Government sa House of Representatives ang House Bill 8800 o ang Conversion sa Municipalidad sa Claver isip Component City sa Probinsiya sa Surigao del Norte nga gipangamahan ni Rep. Robert Ace Barbers sa 2nd Congressional District sa Surigao del Norte.
Sa nahimong pagdungog kagahapong adlawa, gipangunahan ni Cong. Manuel Sagarbarria ang unanimous nga pag-apruba sa balaodnon nga gisegunduhan ni Cong. Faustino Dy V sa Isabela.
Sa nasangpit nga pagdungog, mitambong mismo ang mayor sa Claver nga si Mayor Georgia Gokiangkee diin sa iyang privileged speech gitumbok niini ang ka-progresibo sa Claver nga nagsugod isip hilit nga barangay hangtud nga nahimong lungsod og karun mahimong ikaduha nga siyudad sa probinsiya sa Surigao del Norte.
Gitumbok ni Mayor Gokiangkee nga kwalipikado ang ilang lungsod nga mahimong component city base sa rekisitos nga gitakda sa Local Government Code sa hisgutanang income og land area.
Sumala pa niini nga milapas sila sa annual average income nga kapin 200 Milyones pesos base sa sertipiko sa Bureau of Local Government Finance samtang misobra usab sa minimum land area base sa Land Management Bureau nga dunay kapin 300 square kilometers o 30 thousand hectares.
