BUTUAN CITY – Mubiya dinhi sa Butuan ang Balangay Boat nga Samal Tawi-Tawi padulong sa kauluhang Manila pinaagi lang sa paglawig sa kadagatan.
Sa pakighinabi ning sibyahan kang Arc Valdez, expedition leader, giklaro niini nga ang maong Balangay Boat, gihimu niadto pang 2010 kauban ang Masawa Hong Butuan ug Diwata ng Lahi nga anaa na karun sa National Museum, diin pareho nang nakalawig sa Southeast asia sulod sa 7 ka bulan.
Gikan pa sila sa Sulu og mi-agi sa Butuan aron mangayu ug bendisyon sa igsoon niining Balangay Boat.
Pagbutyag pa ni Valdez nga kagahapon pa unta sila molawig ngadto sa Manila apan dunay kusog nga tagas sa sakyanan hinungdang ila pa kining gipa-ayo.
Sumala pa niini, molawig sila pinaagi sa layag apan duna gihapoy makina ang Balangay Boat nga usa ka kahoy aron dunay magamit panahon sa emerhensiya.
Kinahanglan usab ang makina aron sila pasudlon sa Hong Kong ilabina kay gikatakda silang molawig ngadto sa China karung Abril 27.
Samtang gipasabot ni Valdez nga usa ka dakong dungog sa mga Butuanon ang Balangay Boat.
Gani, siya nga taga Manila, na-agni nga mahimong honorary citizen sa Butuan tungod lang sa maong kahoy nga baroto.
Gipadayag niini nga tinguha sa ilang grupo nga mapakita sa tanang kababayang Filipino nga kaya ang bisan unsang kalisud sa kinabuhi basta duna lama’y pagtambayayong ug kooperasyon aron makaabot sa sunod nga pantalana nga mao ang pantalan sa kalambuan.
Nasayran nga sila nga grupo sa mga Pinoy nga mikatkat usab sa Mount Everest. (Rolan Janea)
