BUTUAN CITY – Duna lama’y hangtud Oktubre 15 ang mga interesadong film makers ning rehiyon sa Caraga ilabina sa taga-Butuan City ug Agusan del Norte aron isubmite ang ilang entry alang sa pinaka-unang paglusad sa Balangay Independent Film and Theater Festival nga himuon karong tuiga.
Sa eksklusibong pakighinabi ning sibyahan, gibutyag ni Jonlou Tordos, ang proponent sa maong proyekto, gipasi-ugdahan kini sa Butuan City government pinaagi sa City Public Information Division kauban ang City Tourism and Cultural Affairs Department (CTCAD) ug Depatment of Trade and Industry kon DTI-Caraga. Usa kini ka paagi sa pagsa-ulog sa buhong nga cultural heritage sa Butuan City pinaagi sa ‘art of filmmaking’ ug performing arts competition sa ingon mapasundayag ang ka-abunda sa dakbayan sa storytelling tradition ingon man sa storytelling talent sa mga Butuanons.
Ang maong proyekto nga ilusad sa Nobyember 15 hangtud 17 dungan sa Kasambay Hong Butuan Theater Arts Festival, mangita og maayong gama nga minugbo nga salida ug mga theater-performances act kalabot sa kultura sa dakbayan sa Butuan. Ang maayong pagkagama nga salida ilabina kadtong mutatak sa mga manan-away kalabot sa kasaysayan ug kultura sa Butuan, maoy mudaog.
Naghulat sa mga mananaog ang kapin 2-milyunes pisos nga pundong igahin sa DTI-Caraga ug sa cilty government kondiin sien-mil pisos ang madawat sa mukampyon.
