BUTUAN CITY– Gibana-banang niabot sa ₱5 milyon hangtod ₱10 milyon ang kinatibuk-ang kadaut nga naangkon sa lungsod sa Malimono, Surigao del Norte human sa pag-igo ni Bagyong Basyang niadtong milabay nga semana.
Apektado ang mga motorista tungod sa pagkadaut sa steel bridge sa Cantikoy, Barangay Can-aga ug sa pagkahagsa sa concrete tourism road sa Sitio Tagbuyawan, Purok 8, Barangay Pili. Gihimo na ang clearing operations sa mga lugar nga naapektuhan, apan dili pa gihapon maagian sa sakyanan gawas sa motorsiklo tungod sa grabe nga kadaut sa dalan ug tulay.
Sumala ni Mayor Arnel Amalla, prioridad sa lokal nga kagamhanan ang paspas nga pag-ayo sa mga nadaot nga imprastruktura aron mabalik sa normal ang biyahe sa katawhan ug mga motorista.
Samtang, ang mga personahe sa SURNECO nagpadayon sa pag-ayo sa mga linya sa kuryente aron mabalik sa normal ang suplay sa elektrisidad sa mga apektadong lugar.
