BUTUAN CITY – Gikagubtan karon sa Australia ang kontrobersyal nga duwa nga gitawag og Run Nation Championship (RNC) diin ang tumong mao gyud ang pagbangga sa duha ka players.
Ang duha ka kusgan nga contestants kusog nga mudagan padulong sa usa’g usa aron mapukan ang ilang kontra pinaagi sa bangga.
Ang maong sport nakuha gikan sa “run it straight” nga trend sa social media diin ang mga tawo magbangga alang sa views ug kasikat online.
Tungod sa kadaghan sa motan-aw, gisulayan karon sa RNC nga himuon kining mainstream sport kondiin sama sa boxing, adunay lain-laing weight classes ang RNC, ug kadaghanan sa participants adunay background sa rugby, football, o combat sports.
Sigon sa co-founder niini nga si Tremaine Fernandez, naningkamot sila nga himuong mas luwas ang sport pinaagi sa mga lagda ug pag-screen sa mga players.
Bisan pa niini, giangkon niya nga naa gihapon ang peligro sa concussion ug uban pang seryosong injuries.
Ang uban nga medical experts sama kang Rowena Mobbs, gusto nga ipahunong ang sport kay dako kaayo ang risgo sa kadaot sa utok tungod sa kusog nga panagbangga.
