BUTUAN CITY-Talagsaon lamang ang sitwasyon sa mga Indonesians nga hatagan og pinasahing pangalan ang ilang mga anak sama na lang sa magti-ayong gikan sa Tuban regency, East Java nga gihatagan og 18 ka pangalan ang ilang ikaduhang anak.
Karon, nagproblema na sila tungod kay dili mahatagan og birth certificate ang bata sa rasong dili mag-igo ang pangalan niini sa official civil registry documents.
Nasayrang gibalibaran sa mga lokal nga opisyales nga mahatagan og civilian documentation ang bata tungod kay ang pangalang “Rangga Madhipa Sutra Jiwa Cordosega Akre Askhala Mughal Ilkhanat Akbar Sahara Pi-Thariq Ziyad Syaifudin Quthuz Khoshala Sura Talenta” dili maigo sa papeles.
Sumala sa taga-civil registry sa East Java, dunay maximum nga 55 characters lamang dapat ang pangalan nga ibutang sa official civil registry documents sa Indonesia.
Nasayrang niadtong 2019 usab, gihimugso ang bata nga gihatagan og alyas nga Cordo, apan sa pagkakakron, wala pa kini’y birth certificate busa naka-ideya ang mga ginikanan nga magpagawas na lamang og open letter kay Indonesian President Joko Widodo alang sa pagpangayo og tabang.
Sa kasamtangan, wala pa’y gipagawas nga public statement si President Widodo kalabot niini.
