BUTUAN CITY – Laing warrant of arrest ang gipagawas ni Judge Ferdinand Villanueva sa Bayugan City, Agusan del Sur Regional Trial Court (RTC) Branch 7, batuk kang Dr. Maria Natividad Castro alang sa kasong kidnapping ug serious illegal detention, ang susamang kaso nga gihapak batuk kaniya apan gibasura.
Niadtong Hunyo 16, gi-isyu ang e-warrant batuk sa doktor kinsa gi-apil sa indictment kondiin base sa mga court records, wala matud pa nataral si Dr. Castro rason nga dili ma-apply ang double jeopardy.
Dugang pa sa korte, mas maayong mahisgutan sa korte ang mga claims ni Castro pinaagi sa full-blown trial.
Madumdumang unang nadakpan ang 53-anyos nga si Castro sa San Juan City niadtong Pebrero 18 base na sa gi-isyung legitimate ug judicial court warrant.
Gibuhian siya paglabay sa 42 ka mga adlaw dihang nagdesisyon si Bayugan RTC Acting Presiding Judge Fernando Fudalan Jr. nga napakyas ang mga prosecutors pag-isyu og subpoena alang sa preliminary investigation sa iyang kaso kansa kalapasan sa katungod sa doktor ngadto sa due process ug migawas pa sa preliminary investigation nga dili siya apil sa original complaint.
Hinuon ang mga kaso batuk sa mga ka-ubanan niyang akusado nga sila Manuel Anob alias Masayod/Salem), Toto Anob alias Dongkot ug Imelda Rambuyod alias Aloy/Sandara, gi-retain.
Una nang gipadayag sa reklamanteng si Bernabe Salahay, nga ka-uban si Castro sa mga midagit kaniya niadtong Disyembre 19, 2018 ug personal matud pa niyang nakita ang doktor nga maoy mitambal sa mga angol sa rebeldeng NPA.
Gibuhian matud pa siya og ang iyang ka-ubang si AJ Reginal niadtong Pebrero 18, 2019 sa Sitio Kaunlaran, Barangay Tagbongabong sa lungsod sa Remedios Trinidad Romualdez, Agusan del Norte.
Nasayrang sila Salahay ug Reginal apil sa pipila ka mga sakop sa Citizen Armed Force Geographical Active Auxiliary members nga gidagit sa NPA aron ma-aghat ang kagamhanan nga ipadayon ang peace talks.
Sa pagbuhi sa maong kaso, gipahiumduman sa korte ang depensa nga likayan ang pag-insulto sa prosekusyon.
