BUTUAN CITY – Dunay duha ka mga hinungdan nga gilantaw ang otoridad mahitungod sa pagkakaplag nalang sa patay’ng lawas sa usa ka sundalong babaye sa nakalabay nga gabii sa usa ka lawak sa ktv bar sa Barangay 3, Buenavista, Agusan del Norte.
Nasayran nga base sa findings sa SOCO team, walay foul play ang kamatayon sa biktima nga si Private Rhemae Mensag Delamance, 22-anyos, dalaga, residente sa Barangay Salae, Dakbayan sa Malaybalay ug kasamtangan nga nadestino sa 23rd Infantry Batallion Phil. Army nga nakabasi sa Barangay Alubihid lungsod sa Buenavista Agusan del Norte.
Posible matud pang nag-unay sa pagpusil ang biktima o kaha aksidenteng mibuto ang iyang issued firearms nga 9mm pistol nga miigo sa kilid sa ulo ug milapos ang bala.
Kini ang rason nga padayon karung gilusad sa Buenavista Municipal Police Station ang lawom nga imbestigasyon. Mahinumduman nga misulod sa ktv bar ang biktima nga nag-inusara bandang alas 3:00 pa sa hapon og naabtan nalang sa alas 7:00 sa gabie wala na migawas rasong giadto sa taga KTV bar ang lawak og didto ilang nakita nga wala nay kinabuhi ang biktima nga nagbuy-od sa lingkuranan og naligo sa kaugalingong dugo.
Narekober sa crimescene ang usa ka unit sa 9 mm pistol nga dunay magazine nga loaded sa mga buhing bala nga anaa sa dool sa kamot sa maong biktima, usa ka basiyo sa bala, salaping cash nga balor 14 mil ka pesos ug cellphones.
