BUTUAN CITY – Padayon pang gi-imbestigahan sa kapulisan sa Davao City ang natigayong pagpanulis-patay ning mi-aging alas-3:00 sa kaadlawon sa Daang Maharlika Highway sa Km. 16, Brgy. Ilang, nga mikalas sa kinabuhi sa 33-anyos nga si Mary Joy, taga-Mañalac, New Pandan, Panabo City.
Migawas sa imbestigasyon nga sakay ang biktima sa usa ka Isuzu elf truck nga gimanihuan sa iyang ka-ipon nga si alyas Dino kansa gikan naghatud og scrap metals sa usa ka dakong steel coproation sa maong dapit nga nahitabuan aron unta maka-uli na sa Panabo City.
Duna matud pa’y mibabag kanila nga duha ka tawong sakay sa motorsiklo ug mi-alegar nga duna sila’y traffic violation hinungdan nga minaog si alyas Dino, apan ang angkas sa motorsiklo, mi-adto sa passenger side sa elf ug milanog na ang buto sa armas hangtud nga nakita na lang ni Dino nga gibitbit na ang bag sa iyang ka-ipon nga duna’y sulod nga ₱200,000.00 ug mga alahas kondiin daling misibat ang duha ka lalaking sakay sa motorsiklo padulong sa wala matino nga direksiyon.
Dihang mi-abot ang 911 emergency team, gideklarang patay na ang biktima kinsa naka-angkon og samad-pinusilan sa ubos nga bahin sa iyang gusok.
Narekober sa kapulisan ang usa ka basiyo sa .45 kalibre nga pistola ug upat ka mga singsing nga iya sa biktima.
