BUTUAN CITY – On-the-spot nga nakabsan sa kinabuhi ang usa ka babaye human nadasmagan sa usa ka kotse kaganinang alas-5:40 sa buntag sa national highway sa Purok 7, Brgy. Libertad ning siyudad sa Butuan.
Naila ang biktimang si Natividad Ortega, 60-anyos, residente sa Brgy. 1, Brgy. Libertad ning siyudad samtang ang driver sa kotseng nakabangga niini nailang si Nelson Quiñones, 36-anyos, minyo og residente sa Purok 2, Brgy. Bancasi ning siyudad.
Sigon sa maguwang sa biktimang si Esmeralda, kada-adlaw nga mag-jogging og mag-exercise ang iyang manghod rason naka-abot kini sa dapit nga nahitabuan.
Nag-andam na matud pa siya og pandesal rason nga iyang gisugo ang biktima pagpalit og kape apan dako na lang ang iyang katingala nga wala na kini makabalik pa hangtud nga gipahibalo na lang siya sa nadangatan niini.
Samtang aminado ang responsable sa kamatayon ni Natividad Ortega nga tungod sa kakalit sa hitabo, wala siya maka-brake sa iyang gimanehuang Kia Rio.
Sa eksklusibong pakighinabi ning sibyahan, gibutyag ni Nelson Quiñones nga gikan matud pa siya sa ilang balay og padulong unta sa sentroing bahin ning siyudad apan pag-abot sa dapit nga nahitabuan, nakita na lang niyang kalit nga mitabok sa iyang lane ang biktima.
Gani gilikayan pa niya kini apan nasapon gihapon sa kilid nga bahin sa iyang sakyanan rason sa pagkabu-ak sa iyang wind shield.
