BUTUAN CITY- Gihatagan og katin-awan ni Atty. Race Del Rosario, RN., usa ka Legal Expert, nga ang impeachment complaint batok kang Vice President Sara Duterte dili awtomatikong moresulta sa impeachment bisan pa og makit-an nga “sufficient in form, in substance, ug in grounds.”
Sumala pa niini, nga ang sufficiency in form nagtan-aw sa teknikal nga aspeto ug porma sa complaint, samtang ang sufficiency in substance nagdeterminar kung adunay rason aron dawaton ug imbestigaran sa House of Representatives.
Samtang ang sufficiency in grounds, nagtan-aw matud pa sa konstitusyon aron masuta kung ang mga akusasyon mahimong ikonsidera nga impeachable offenses. Sigon usab ni Del Rosario, nga nasabtan niini kung nganong gitawag kini og political proceeding sa mga “Diehard Duterte Supporters” tungod nakabase lang sa diskresyon sa mga mambabalaod.
Apan taliwala paman niana hatagan pa usab og higayon ang prosecution ug ang Bise Presidente nga mopresentar sa ilang mga ebidensya ug mga mo-testigo atol sa committee hearing.
Dugang pa ni Atty. del Rosario, nga usa kini ka “missed opportunity” alang kang VP Sara tungod kay wala pa kini sa trial, ug mahimo pa niini nga makadepensa sa iyang kaugalingon atol sa hearing aron marepudyar ang ebidensya sa prosecution.
Matud pa niini, nga sayop ang pagsalig nga sa Senate trial pa kini motubag, diin asa mas komplikado ug mas “bloody” ang proseso sa trial kumpara sa hearing. Sa kasamtangan, gihatagan pa og courtesy si VP Sara isip naglingkod nga opisyal, apan sa trial dili na kini tugotan tungod kay kinahanglan nga impartial ang mga maghuhukom.
Gipunting usab ni Del Rosario, nga dili malikayan ang arbitrariness sa hearing, apan ang kaayohan niini mao nga gibuhat kini nga transparent ug bukas sa publiko pinaagi sa live streaming.
