BUTUAN CITY- Gipadayag sa Philippine National Police–Criminal Investigation and Detection Group kon PNP-CIDG nga posibleng nahibalo ug nakapangandam na ang negosyanteng si Atong Ang sa pag-isyu og arrest warrant batok kaniya, sumala ni PCol. John Guiagui, hepe sa National Capital region kon NCR-CIDG, tungod sa lawom nga koneksiyon ug daghang resources nga gipanag-iya ni Ang sa tibuok nasud.
Giangkon sa kapulisan nga lisod nilang makit-an ang gitago-an sa pugante apan gitamdan ni Guiagui nga dili kini babag sa padayon nga manhunt operation.
Gituohan sa ahensiya nga nagpabilin pa si Ang sa Pilipinas ug wala’y rekord nga nakagawas kini sa nasud, gani hugot usab ang ilang pagpangita hangtod nag kini madakpan.
Gibutyag usab nga padayon ang beripikasyon sa mga tips ug impormasyon nga nadawat sa hotline. Kahinumduman nga una nang gipatumaw ni whistleblower Julie Patidongan kansa mingtudlo usab kang Ang isip utok sa pagkawala sa mga sabungero, nga nakagawas na kini sa nasud.
Sa press briefing sa Camp Crame, gibutyag ni PNP spokesperson PBGEN Randulf Tuaño nga giimbestigahan na usab ang pipila ka aktibo ug retiradong pulis lakip ang senior officials nga posibleng mingtabang kang Ang.
Sa kasamtangan, adunay duha ka arrest warrant nga giisyu batok kang Ang gikan sa korte sa Laguna ug Batangas, samtang nagpabilin ang patong sa ulo niini nga nagkantidad og ₱10 milyon alang sa iyang pagkasikop.
