BUTUAN CITY – Dakong garbo alang sa lungsod sa San Francisco, Agusan del Sur si Gerilin Ano-os Gascon, human siya nabutang sa rank 14 sa 2025 bar examination result sa tibuok nasud kondiin alumnus siya sa Bukidnon State University kon BukSU College of Law, batch 2025 human nakakuha og 89.79-porsiyento nga marka.
Sa eksklusibong pakighinabi sa Bombo Radyo, gipadayag ni Gascon kinsa usa usab ka Certified Public Accountant (CPA) ug nagtrabaho sa Landbank of the Philippines – Bukidnon Lending Center sa Malaybalay City, ang iyang kalampusan tungod sa iyang pamilya nga maoy dako niyang motibasyon, apil na sa simbahan.
Kini ang rason nga fulfilling alang kaniya ang nakab-ot nga kalampusan tungod kay matuman naman niya ang dugay na niyang tinguha nga makatabang siya sa mga nanginahanglan ilabina sa legal nga proseso. Aminado kining dili sayon ang iyang panaw sa pagkab-ot sa maong damgo ilabina nga usa siya ka inahan ug nagtrabaho pa.
Dugang pa sa bag-ong abogada nga wala siya maglaum nga ma-apil siya sa top 20 tungod kay dili siya sigurado sa mga tubag atol sa eksaminasyon. Hinuon iyang gisalig ang tanan sa Kahitas-an rason nga dihang nasayran siyang ranked 14 siya, igo na lang siya sa paghilak ug pagpasalamat sa Ginoo sa gihatag kaniyang kalampusan.
Nasayrang siya usab ang bugtong representante gikan sa Mindanao tali sa 20 ka mga topnotchers sa maong bar examinations, hinungdan nga ang BukSU nahimong nag-inusarang law school sa Mindanao nga adunay topnotcher karong tuiga.
